Tilbod i Uskedalen

Bygda er omskreve alt i 1366 som 'Oskudal' og i 1403 som 'Oskudalr'
Namnet skriv seg truleg frå elvenamnet 'Oska'. Det  tyder 'ynskjeelva' - det vil seia ynskje om ei god fiskeelv.

Utanfor, i Hardangerfjorden, ligg den facinerande øya Skorpo (234 m.o.h, merka rute til toppen).
Her finn du jettegryter, hegrekoloniar - og det mystiske 'Skorpetrollet'.

Rabben Camping, som ligg der elva renn ut i fjorden, har 18 store og små hytter og god plass for telt og caravanar. Leikeplass for born, båtutleige, badeplass og kiosk.

To flotte båthamnar 
Uskedalen har to flotte båthamnar med dei fleste tilbod til båtturistane.
Hamna til Uskedalen Båtlag, som  har 110 båtplassar, har gjesteplassar. I sanitærbygget er det dusjar, toalett og vaskerom med vaskemaskin og tørketrommel.
 

Øyro Marina har og gjesteplassar for både store og små båtar. Her er det og plassar for telt og campingbilar nær sjø og elv.
Det er leikeplass for born og sanitærbygg med dusj, toalett, vaskemaskin og tørketrommel.   

Solheim Turiststasjon ligg i sentrum. Her er det overnattingsplass med frukost, åtte gjesterom, selskapslokale, møterom og trådlaus tilgang til internett.   
Dønhaug Gjestegard, som ligg høgt og fritt ovanfor sentrum, har overnattingstilbod, selskapslokaler og pub med alle rettar og kan lokka med aktivitetar som jakt, fiske, riding og låvedans.  

Bygda har to solide bedrifter, Eidsvik Skipsbyggeri som m.a. byggjer havgåande fartøy, og Brødrene Hjønnevåg, som lagar fiskemat.
Uskedalen Oppvekstsenter med skule og barnehage ligg i sentrum, i kombinasjon med Aktivitetshuset. Der er det og ei grusbane,
På Heio eit lite stykke oppe i dalen ligg idrettsplassen, med grasbane for fotball og bane for friidrett. Uskedalen er også eit fristande mål for sykkelturistar.

Mange tilbod og gode kommunikasjonar
Uskedalen har mange tilbod, til dømes daglegvarebutikk, byggvarebutikk, bruktbutikk, frisør, bank og post i butikk, blomebutikk, bensinstasjon og bilverkstad.

Bygda har gode kommunikasjonar med buss, ferje og båt til Husnes/Stord/Haugesund, Rosendal/Odda, Bergen og Oslo.
Frå Uskedalen kan ein lett nå andre attraksjonar og aktivitetstilbod i Kvinnherad, til dømes Fjellhaugen Skisenter (ein halvtimes køyring), Folgefonna,
Baroniet og puttbana i Rosendal og golfbana på Husnes.

Er du på leiting etter: 

-eit Noreg i miniatyr frå fjord til fjell

-eit lite, men levande lokalsamfunn med barnehage og skule

-lokalbutikk som har 'alt'

-aktivt kulturliv og mange arrangement.

-gode moglegheiter for fiske

-turisttilbod i variert natur

-båthamnar av fyrste klasse

-campingplassar og turiststasjon

...då er Uskedalen svaret!