Søk
 
Kontakt oss
Kontakt uskedalen.no:
Tips til redaksjonen
E-post: uskedalen.no
Kristian Bringedal
Tlf nr:915 31 487
Svein Rimestad
Tlf nr:911 09 868
Vidar Haugland
Tlf nr:488 91 464
Hans Ordin Østebø
Tlf nr:907 56 032
- - - - - - - - - - - - - - - - - - -
Kontakt Uskedal Utvikling
E-post
- - - - - - - - - - - - - - - - - - -
Bli medlem
Årspriskr 200.-
Kontonr. 1503 39 82329
Last ned giro
VIPPS 512870
- - - - - - - - - - - - - - - - - -
Nettsider frå Uskedalen
Festidalen
Uskedal Idrettslag
Uskedal elveeigarlag
Aktivitetar i Uskedal

90-årig historieforteljar og munnspelar sentral i flott julefest!

28.12.2018
Klikk på bilete for full storleik
Trygve Haugland gav festlyden eit flott ekstrainnslag då han trekte fram munnspelet.
 
Den tradisjonsrike julefesten i Vonheim vil bli hugsa ekstra godt dette året.  I tillegg til dei faste gode innslaga, bidrog 90-årige Trygve A. Haugland i to programpostar som publikum sette svært stor pris på.  Den fullsette salen fekk oppleva han både som munnspelar og som formidlar av historia til Vonheim og til denne festen.  Elles var det mykje kjekt på programmet på festen.
 
Klikk på bilete for full storleik
Det var fullt på alle stolar då Tor Ove Haugland ønskte velkommen
 
Klikk på bilete for full storleik
Kusinene Nora og Ida les juleevangeliet.
 
Frammøtet var så godt at arrangørane sette fram ekstra stolar før Tor Ove Haugland ønskte velkommen.  Musikklaget innleia programmet med julemusikk slik dei har gjort på alle festane frå 1987.  Deretter var det klart for juleevangeliet som vart fint framført av kusinene Nora Huse Kristoffersen og Ida K. Øyjord.
 
Etter dette fekk vi eit svært interessant 'historisk kvarter'.  Tor Ove Haugland var intervjuar og bestefar hans Trygve Haugland fortalde om historia til forsamlingshuset Vonheim frå det først var stall i Sandvikjo, vidare til det fungerte som ungdomshuset Helgheim nede i bygda til det enda opp der det no står i 1934.  Han  hugsa flyttinga godt, og fortalde mellom anna at han som liten gut sat på lasset då materialane vart frakta med hest og kjerre til Haugland der huset vart bygd opp att etter 'ein dugnad til tusen'!
 
Han kunne og fortelja at han hadde høyrt at det hadde vore strid om plasseringa.  Først var det meininga at det skulle plasserast der utfloren til Steinar og Cathrine Haugland står, men då kom det protestar frå øvre delen av dalen.  Etter oppmåling vart huset plassert der det står i dag,  Tomten vart kjøpt av Kristoffer Haugland(bruket som Bjørn Egil Haugland eig i dag), og etter det Trygve hadde høyrt var det kona til læraren Andreas Haugland som betalte tomten med 500 kroner.  Det var også usemje når det kom til lovar, og det var ein ganske heit strid.  Noko av dette gjekk på om det skulle vera bedehus elle grendahus.
 
Klikk på bilete for full storleik
Det var svært interessant å høyra då Trygve fortalde historiske glimt i samtale med sonesonen Tor Ove
 
 
Julefestar har det vore kvart år heilt frå starten.  Trygve meiner den første var for 82 år sidan. Det var læraren som styrte med festane.  Dei starta alltid med juleevangeliet.  Han fann og alltid noko til opplesing i julehefte, og elles var det alltid mykje song.  Første tida utgjorde alltid elevane på skulen songkor.  Trygve var med alt på første festen, og han minnest då dei var 11 elevar i koret rundt 1940 og song trestemt under nemnde lærar Haugland si leiing.  Det var ikkje stopp i julefestane i krigsåra.
 
Juletregang høyrde med, og dei var ofte 3-4 ringar rundt treet.  Festen vart alltid avslutta ved at dei stod rundt treet og song siste verset av No koma Guds englar.
 
Det var også andre årvisse festar i Vonheim som var svært mykje brukt første tida, - m.a. haustfestar.  I den samanheng kunne han fortelja at sidan det ikkje var kjøkken, måtte dei ty til naboane når dei skulle mat.  Då vart det kokt på Heio, og så vart maten boren i store gryter.
 
Dei frammøtte fekk ei svært interessann historiestund krydra med artige små opplevingar gjennom åra.  I tillegg til at det var svært interessant å høyra på Trygve, vil eg og framheva barnebarnet Tor Ove som kom svært godt frå rolla som godt førebudd intervjuar.
 
Søstrene Sunniva og Karoline hadde kjekke selskapsleikar.
 
Jentene vann over gutane i den spennande stafetten skoleiken
Etter dette var det ungdommane som tok seg av neste programinnslag.  Sjølvsagt høyrde dei kjekke selskapsleikane med.  Med stødig hand styrde søstrene Sunniva og Karoline Ersland Myklebust publikum gjennom tre kjekke leikar.  God underhaldning og konkurranseinstinktet kom tydeleg fram både hos unge og eldre i både skoleiken, finneleiken og då dei skulle konkurrera om å vera raskast å få isbitar til å tina.  
 
 
Nissen vart møtt med munnspelmusikk då han kom med pakkar til barna.
 
Før det vart matøkt, fekk vi eit skikkeleg bonusinnslag.  Trygve A. Haugland hadde teke med seg munnspelet og viste til fulle at han ikkje hadde gløymt gamle kunster frå då han ofte spela til turdansar i Helgheim i krigsåra og åra som fulgte.  Han opna med Glade jul før han fulgte opp med gammal reinlendar.  Ekstranummer vart forlangt, og  då trylla han fram Dansen på måkeskjer.  Det var nok mange i salen som hadde lyst å ta seg ein svingom då!  I det han var ferdig, kom nissen inn døra, og då slo 90-åringen like godt til med På låven sitter nissen.  Tenk dåke den julestemninga!!!
 
Etter programmet var det som vanleg klart for matøkt før det vart avslutta med gang rundt juletreet.  
 
Etter å ha vore på rundt 30 juletrefestar i Vonheim, kan eg slå fast at denne tradisjonen lever vidare i beste velgåande.  Ja, forma er stigande, og etter årets fest å dømma, er den på veg mot nye høgder!!
 
 
 
Uskedal musikklag har spelt på Vonheimsfesten dei 32 siste åra.
 
 
 
Tekst, foto og nett:  Thor Inge Døssland
 
 
 
 
 
  Tilbake

 
Lesarbilete
Notisar
17.01.2019
Kjell Yri går opp nye turløyper på La Gomera.
Kjell Yri har i denne veka vore på den kanariske øy La Gomera for å gå opp nye ruter. Det er gjort i regi av reiseselskapet Rundtomkring. Mona Enes og Kjell Yri er engasjert som turleiarar på Kreta. No vert turtilbodet utvida til også å ta med La Gomera.

kb
17.01.2019
Kommunen, bygdelaga og utviklingsselskapa.
Kva rolle og funksjon skal kommunen ha i høve til bygdelag og utviklingsselskap ? Kvifor er Kvinnherad kommune medlem i og har luter i Rosendal utvikling og ikkje i Uskedal utvikling. Det er det som er spørsmålet i sak i F.skapet i dag. Rådmannen rår til utmelding og at det er lik praksis overfor alle bygdeutviklingslaga i kommunen.

kb
17.01.2019
Berre ein uskedeling på Krf-lista.
Krf har no klar listeframlegget til kommunevalget til hausten. På lista finn vi berre ein uskedeling. Det er Knut Olav Myklebust(42) som er plassert som nr. 19 av dei 21 kandidatane. På topp er som venta Marit Årthun frå Åkra. Ho er også den einaste kumulerte. Lista vert endeleg vedteken under nominasjons- og årsmøtet i Rosendal 4.februar.

tid
15.01.2019
Årsmøte i Sogelaget er lagt til Uskedalen.
Årsmøte 2019 i Kvinnherad Sogelag er lagt til Uskedalen. Møtedato er laurdag 27. april. I forkant av sjølve årsmøte vert det føredrag, synfaring og gjesting med bakgrunn i eit tema som høver med plassen. Styremedlem Audun Eik er med i førebuingsnemnda.

kb
15.01.2019
Sagbekken - ikkje Saghaugbekken.
Ein lesar har merka seg det Uskedalen.no skreiv om vegutbering på Fylkesvegen ved nedkøyrsla til Beinavikjo. Rett namn på bekken skal vera Sagbekken, ikkje Saghaugbekken. Takk for merknad.

Red.
14.01.2019
Opningstider for Elins Matgleder, Rosendal
Elins Matgleder, Rosendal startar opp etter juleferien torsdag 17. januar kl. 11.
Nye opningstider er:
Torsdag - laurdag: kl. 11 - 17.
Sundag: kl. 14 - 18.

kb
14.01.2019
Skirenn til helga.
Med lovande vermeldingar ser det ut til at det planlagte skirennet i langrennskarusellen søndag kjem til å gå som planlagt.  Rennet går i klassisk stil, og det er UIL som er arrangør. Påmeldinga er opna, og det kan gjerast HER.  Arrangørane oppfordrar alle til å nytta høve til å vera med i trimklassen.

tid.
13.01.2019
Møte om framtidig eldrepolitikk, tysdag 15. jan. kl. 18.
Helselaga Seimsfoss, Rosendal og Løfallstrand inviterer til møte om framtidig eldrepolitikk i kommunen. Uskedal helselag er invitert og vil delta på møte. Møte er ope for alle og vil ha fokus på tiltak for eldre i åra framover. Møte er i Rosendal samfunnshus tysdag 15. januar kl. 18.00.

kb
12.01.2019
Gudsteneste med vikarprest Arne Natås.
Gudstenesta denne helga er ved vikarprest i Sunnhordland Prosti, Arne Natås. Natås har før vore sokneprest i Røldal. Det er nattverd. Gudstenesta i Uskedal kyrkje er kl 11.

kb
12.01.2019
Vasslekkasjen er lokalisert, men ikkje med nøyaktig funnplass.
Vasslekkasjen er lokalisert til Korsneset Byggefelt, men ein veit framleis ikkje nøyaktig plass. Difor bed leiar i Uskedal Vassverk alle om å sjekka vassinntaket til husa sine. Alle med naust og uthus må vera særleg merksame, høyra om det er sus i røyrane eller om det er ein synleg lekkasje i tunet eller i vegen. Det renn ut 3 liter pr. sekund. Ta kontakt med Hans Reidar Kjærland på mobil: 997 01 819

Uskedal Vassverk
Siste Nyhende
17.01.2019
Hus og bustader som vert selde i Uskedalen.
I ein oversikt i Kvinnheringen nyleg kom det fram at 6 hus/bustader ligg ute for sal i Uskedalen. Tre av desse ligg på Tveitane langs Uskedalsvegen, del av tremannsbustad ligg i Halsabrotet 7B og del av tomannsbustad ligg i Ospelunden 9A. Det har til tider vore god omsetnad på husvære i Uskedalen. Det som er av leilegheter, er delvis utleigd i samband med Hydroutbygginga på Husnes.
15.01.2019
kr. 180.000,- av grasrotmidlane til Uskedalen.
Knappe kr. 180.000,- av Grasrotmidlane går til 8 ulike laga og organisasjonar i Uskedalen. Midlane kjem frå Norsk Tipping. Dersom laget er registrert i Frivilligregisteret, kan 7 % av det tipparen spelar for gå til eit lokalt lag. I Uskedalen er det åtte organisasjonar som vert overført midlar for 2018. Uskedal Idrettslag toppar lista med ei løyving på kr. 91.332,- frå tilsaman 136 brukarar. Minst overføring er det til Uskedal Friluftslag med berre ein tippar.
14.01.2019
Kommunen inviterer til Dialogkafe i Helgheim, onsdag i denne veka.
Representantar frå Uskedal Helselag og Uskedal Utvikling vil vera med på Dialogkafe i Helgheim, onsdag 16. januar på dagtid. Det er Kvinnherad kommunen som inviterer til samlinga som vil ha fokus på den eldre delen av befolkninga. Dialogkafeen vert skipa til for å få innspel til arbeidet med ny kommunedelplan for omsorg, helse og sosiale. Det som før har vore delplanar, vil no bli samla i ein felles helse- og sosialplan.
13.01.2019
Brille funnen og teken vare på.
Brille er funnen på gangvegen mellom Hagetunet og busslomma. Vi har skrive om dette før, men ingen har henta brilla som vart hengd opp i gjerde på ein godt synleg plass. Brilla med snor ligg i etui. Det kan vera barnebrille.
13.01.2019
Vikarpresten la inn ei læringsøkt for borna om dåpen.
Tidlegare sokneprest i Røldal, Arne Nataas, er prostiprest og vikar i prestetenesta i Uskedalen fram til ny sokneprest er på plass. I dag på 2. sundag i Openberringstida fekk kyrkjelyden eit møte med Nataas gjennom gudsteneste, dåp og nattverd. Dåpsbarnet Ludvig vart døypt på det som vert omtala som Jesus sin dåpsdag. Ikkje nok med det: Borna i kyrkja i dag fekk ei oppleving og eit minikurs om kva som må til for å gjennomføra ein dåp.
12.01.2019
Den store utreisedagen for sydentur til Gran Canaria.
Gran Canaria er eit populært reisemål for mange uskedelingar. Berre i dag har 10 personar frå eller med nær tilknyting til bygda avgang frå Bergen eller Stavanger med fly med Las Palmas som destinasjon. Talet på dei, som store deler av vinteren bur fast på øya, er om lag det same. I vekene framover kan ein såleis rekna at 20 uskedelingar feirerer i dette område.
11.01.2019
Synfaring på Rød og Haugland med ny kulturkonsulent
Ny kulturkonsulent etter Linda Øen er Anita Lykkja. Lykkja kjem frå Valdres, men har i mange år vore kulturkonsulent i ein av dei mange kommunane på Helgelandskysten. Ho tok til i stillinga på nyåret og brukar dei fyrste vekene på å gjera seg kjend i Kvinnherad. Linda Øen, som no er tilsett som direktør på Sunnhordland Museum, var  med på synfaringa i Uskedalen, dette for å letta overgangen og innføringa i mange saker for Anita Lykkja.
10.01.2019
Stian Helland er søkjar til prestestillinga i Uskedalen.
Stian Helland ( f. 1972 ) er søkjar til soknepreststillinga i Uskedalen. Helland kjem frå Fitjar og har sidan 2014 vore sokneprest i Ringsaker. Han har utdanninga si frå Det Teologiske Menighetsfaktultet ( MF) 2008 - 2014. Stian Helland kan syna til ei brei erfaring frå yrkeslivet og frå kyrkjeleg og kulturelt arbeid.
10.01.2019
Utbetring av Fylkesvegen ved Sagbekken.
Det har lenge vore ei generande dump i vegen der den gamle Sagbekken går i røyr under Fylkesveg 48. No vert skaden utbetra. Det er Kvinnherad Maskin som gjer jobben på oppdrag for MESTA. Årsaka til skaden er truleg brot på hovudrøyra som igjen har ført til søkk i vegbanen.
Sponsorar
S. Rødsten Bilforretning A/S
Spar
Kvinnherad Vekstbedrift AS
Brødrene Hjønnevåg AS
Gros Blomster
Stord Lufthamn
Uskedal Båtlag
Auto 88
Kvinnherad Breiband
Kvinnherad Elektro
Zjakk Frisørsalong
Elins Matgleder
Uskedal Røyr og Multiservice
Solheim Turiststajson
kvinnheringen
Byggeriet
Kvinnherad Energi AS
Tysnes Sparebank
iDrift AS
grenda
Kvinnherad Renhold service
Sparebank 1 SR bank ASA
Kvinnherad Breiband
Utvikla av iDrift AS