Siste Nyhende

I adventstida har det vore lys på julegrana i sentrum sidan 1963. Markeringa har utvikla seg over tid både med omsyn til innhald og tidspunkt. Uskedal Musikkalg har vore med sidan starten. Aktivitetshusets Damevener var i mange år ein viktig part i å utvikla tilskipinga til ei julemesse. Dei siste åra er markeringa forenkla og tilpassa situasjonen med at det er ei samling på ein fredag straks etter arbeidstid.

Både Hjønnevåg og Friheim Gardsmat måtte bed om etterlevering av varer til julemessa i Rosendal i går. Mykje folk og god handel gjorde at verksemder frå Uskedalen gjekk tom for nokre av sine produkt. Kjellaug Hella Myklebust selde alle dei 700 hardingekakene ho hadde med til Jul i Rosendal, og det var faktisk to timar før stengetid kl. 16.

Om lag 50 litteraturinteresserte menneske kom til Dønhaugkjedlaren. Alle fekk eit møte med Jon Fosse si dikting gjennom føredrag og bokpresentasjon. Gaute Haugland og Ingvar Pettersen, som har illustrert fleire bøker i mindre opplag, var med tilskipinga. Kvelden vart gjennomført slik Jon Fosse ville likt det, med stille, ro, pausar og refleksjon. Anne Karin Fomneland las frå diktsamlinga Auge i vind med tonefylgje av Egil Vaage på hardingfele.

Uskedal Utvikling og Korsnes Vel frontar på nytt saka om trafikksikringstiltak på Fylkesveg 48 ved byggefelta Korsneset og Ospelunden. Saka er ein gjengangar utan at noko er gjort så langt, bortsett frå at fartsgrensa er 60 km. No bed søkjarane om ei snarleg løysing før ei alvorleg ulukke oppstår. Alle bebuarane i begge byggefelta støttar søknaden og det er lagt ved underskriftsliste.

Julegrantenninga er fredag 30. november kl. 17. Nytt i år er at den nye grana ved Gamleskulen alt er pynta med vakre lys. Det same er plakatskuret like ved. Det er også montert lysdekor med snøkrystallar på eine kortveggen ved inngangen til Kafe Tiaren. Det er Uskedal utvikling som eig bygget og driftar uteplassen. Asle Moberg og Egil Myhre har gjort alt det praktiske arbeidet med lyssetjinga.

Olaf Agnar Gausvik har skrive limerick om Julagrano i Uskedalen. Limericken er lagt ut på nettstaden Limerickens beste vener, som har 200 vener og mange andre lesarar i heile landet. Julagrano i Uskedalen har kvart år vore pynta med ljos sidan 1963. Det er medlemer i Uskedal musikklag som har stått for dette arbeidet.

Halsnøy har sin tysdagsklubb på Dill. Uskedalen har Kafe Tiaren i Gamleskulen. Husnes har Kulturkafe i Kulturhuset og Røde Kors besøksteneste på Halsnøytunet. Mange bygder har med andre ord sine møteplassar for seniorar og brukarar i bufellesskap. I dag hadde Rustne Menn programmet på Dill. Frammøte var godt og gruppa fekk gode tilbakemeldingar på det som vart presentert.

Frå Bringedalsbygda til Herøysund. Bygdehistorie frå 1850-2018 er bok nr 3 i ein serie om lokalhistorie frå Kvinnherad kommune. I denne boka er lokalhistoria avgrensa til berre å omfatta bygda som dei fleste i dag kallar Herøysund. Som tittelen seier, er dette ei bygdehistorie. Det er ikkje ei slektshistorie, og heller ikkje ei gardshistorie der kvart individ på garden er teke med. Boka vert presentert sundag 2. desember kl. 16 på møte i Grendahuset.

Tidleg laurdag morgon for ei veke rauk det frå pipa i gardshuset på Dønhaug. Humlepungen Bryggjarlag var klar  for brygging av juleølet. Starten var faktisk for 20 år sidan, i eldhuset på bruk nr. 9 på Myklebust. Ole Jakob Albrethson frå Omvikdalen var med som instruktør. Seinare har bryggjarlaget vore aktive med fleire bryggingar kvart år.